近期內地嘅電視節目人氣好勁，《星跳水立方》、《中國好聲音》呀，就算唔記得佢哋個名，都會睇過相關嘅花邊新聞，廣告費自然水漲船高。最近有傳蒙牛（02319）以「天價」五億元（人民幣‧下同）去買《中國最強音》嘅冠名權。
絲絲當然第一時間打去蒙牛求證，發言人就承認，係有買呢個節目嘅冠名權，不過金額就一定冇五億人仔咁多。發言人仲話，公司一路有贊助唔同節目，希望藉此配合公司青春嘅形象。
內地好多電視節目嘅冠名權，成交價都「億億聲」。例如《中國好聲音》第二季冠名權就值2億元，《舞出我人生》就值1.09億元，而特步（01368）一○年就以1.3億元買咗《天天向上》嘅冠名權。有內地網民就覺得，上市公司贊助呢啲節目，等於攞股東嘅錢去燒，不過亦都有人認為，若果真係幫助到銷售，錢用咗都叫做值得。
講番蒙牛，法巴尋日就出研究報告，將蒙牛嘅投資評級由「買入」降為「持有」，目標價26.9港元。法巴話佢最近買現代牧業（01117）股權，以及獲法國達能入股，長遠對公司正面，但短線各項基本因素冇變，股價最近升唔少，風險開始浮現。各位小股民想追貨就要小心。