絲絲講場：梁高美懿匯聚女菁

不過佢就話呢個女菁匯唔係為咗佢而設立嘅，喺舊年底已經密謀成立，話要起帶頭作用。

籲專業女性擔當決策

久未露面嘅梁太尋日以一個新形象出現，留長咗少少嘅頭髮，佢話以前太過忙，無乜時間打理，所以用最方便清爽嘅打扮。講起呢個女菁匯就巴閉喇，係由港交所僱員發起嘅，唔單止係呼籲專業女性重返職場，仲要入埋企業嘅決策層面。

梁太仲笑言話，女菁匯唔係為咗佢而成立，喺舊年第四季，港交所推出關於推動女性加入董事局諮詢文件時，已經密謀成立女菁匯，話要帶頭做起。梁太仲講話以前佢做恒生大班嗰時，都係得佢一位女性，亦係第一位女大班，但之前到佢退休，就已經有五位喇，睇嚟佢真係帶起咗個熱潮喎！

小加：歡迎女士做CEO

對住成場八、九成女性，行政總裁李小加就好風騷滿場飛，仲笑住話，希望假以時日，會有女性做港交所CEO添，話好歡迎有能力嘅女性。