Market Insight：食品股汰弱留強

港股調整，另一個原因係同今晚美國聯儲主席伯南克演說有關。近日幾名鷹派聯儲局委員，放晒風話要聯儲局開始部署退市，美股即使唔多理會屢創新高，但美匯指數在收水憧憬下，升到三個月高位，逼近85，到底伯南克會平衡鷹派的言論扮吓白鴒，抑或對退市提出更確認的訊號，會係後市關鍵。

高盛換貨理由充分

每次出貨時機準到暈的高盛，出得嚟沽工行，難免令人擔心四月至今，升幅唔多的內銀股，再上會有點阻滯。昨日老友一語提醒，睇好睇淡屬於相對性，高盛清工行倉，唔代表睇淡內銀，尤其相對近半年，美、日金融股炒到火紅火綠，實在無必要揸住隻龜速工行，博佢升多三幾個巴仙。

古勝冇點你22/05/2013

萬里長空

諗落老友講得又確係無錯，去年底工行股價係5.5元，前日又係批5.5元，幾乎係原地踏步。相對同期，美國花旗銀行銀股價升30.4%，高盛自己隻股票都升24.6%，即使比較「弱」的富國銀行及美銀，都升17.6%及16.3%，咁睇落去，高盛換貨理由就好鬼充分。

市況整固，古勝趁機寫番幾隻業績股。專攻北美室內無線電話及學前玩具的偉易達（00303），去年全年多賺5.4%至2億美元，每股盈利80.9美仙，派末期息64美仙，連同已派的中期息16美仙，幾近把百分百回饋股東。過百蚊的股票，仍有5厘半的股息回報，如果將半杯水看成半空的話，追求股息的股東，值得擔心係假如未來盈利有波動，無緩衝下會直接影響派息。

統一改善空間較大

偉易達是一隻出色的本地工業股，唯一不明朗可能係第二大市場歐洲的經濟對生意影響有多大，但去年意外地有7%銷售增長，主要多得電子學習產品帶動，今年公司推電子教育等新產品，會成為推動銷售的亮點。

不過，觀乎過去三年公司業績十分穩定，在1.9億至2億美元之間，大行估未來兩年增長在單位數字，往績市盈率18倍，高息是支持股價的護身符，年初87元升到前日121.9元歷史高位後，吸引力經已大減，可揸但不宜加注。

康師傅（00322）及統一企業（00220）的季績，前者盈利表面跌47%，不過撇除收購百事中國業務的一次過影響，實際營業額及經常性溢利分別升37%及3.5%，仍然比市場預期低，尤其對比競爭對手統一，首季賺3.16億元人民幣，按年大升28%，康師傅公布首季毛利率輕微改善0.16個百分點，至29.3%。儘管無詳細銷售數字，但可以估計首季統一在主要生產原料，包括糖、製造即食麵及膠樽飲品的棕櫚油及PET顆粒的跌價浪潮中，較能得益，事實在過往幾年，其經營溢利率及純利率，都不及康師傅，成本控制較差反而在原材料下跌中，有較大改善空間。

康師傅股價今年跌3.7%，統一則升7%，現價一三年市盈率分別為30.7倍及23.5倍，未來利潤率改善的預期，加上估值差距，相信統一會有一段時間，股價繼續跑贏大師兄。

市旺有利新股表現

呢頭先講完光伏股大上大落，嗰頭相關股份又生猛番晒，保利協鑫（03800）及卡姆丹克（00712）分別升9%及10%，所以話跟炒轉身要夠快！今日首天登場嘅銀河證券（06881），勢成市場焦點，由於以近下限定價，預留水位，執筆時暗盤價約升6至8%，抽中嘅股民自然嗒糖！聽講由於近期市況略為轉旺，大型新股表現亦唔差，有近20隻新股趕在下月底前掛牌，缸邊友可以留注錢玩下大抽獎！

古勝