AH對碰：濰柴前景獲看好
上周美國傳媒放風話退市，美股短暫震倉後又升過，道指上周五勁升121點，嘗緊量寬甜頭的日股創近五年高位，日經昨收15,360點。環球進入另一次減息潮，中國多月來堅持唔跟大隊走，唔肯減息，人行仲要不斷在市場進行正回購操作，似在收緊流動性，但四月份M2增速達16.1%，創兩年高，計埋影子銀行對信貸市場流動性影響，內地資金不一定在收緊。A股終於有所反應，連升三日，滬綜指破關高見2,309點，收2,299點，深滬兩市成交增加。
A股氣氛持續好轉
昨日A股大部分板塊跟住大市走勢向上，深滬兩地漲停的股份超過40隻，電子、互聯網、航空、遊戲及前海概念股均為漲市的領頭羊，資金湧入熱炒板塊。內地有媒體指包括金融、財政、土地使用權等正催生簡化行政等改革，有利基建、房產、手機、中資券商及內銀股份。即使內地繼續嗌停IPO，但股市成交升，又傳公司轉向香港求上市，幾隻悶咗多時的中資券商股即時起哄，同時有A股上市的中信証券（06030）、海通證券（06837）齊齊彈高4.8%，有貨者不妨繼續持有，無貨者要追都諗得過。
重型卡車機械商濰柴動力（02338）繼一一年盈利倒退後，去年業績再跌，只賺29.9億元人民幣，按年跌47%，今年首季盈利8.13億元人民幣，仍按年跌20.7%。不過，在首季業績後，股價唔再跌，反而緩緩向上，其主要股東濰柴控股及其24名自然人股東，自願將所持的A股限售股延期三年至一六年四月，消息支持A股，亦帶動H股，反映股東對其前景的睇法，不妨跟進，股價昨收復10日線，報29.55元，升2%。
一飛