呢排係上市公司開股東周年大會嘅高峰期，小股東把口會好攰o架，一係猛問嘢，一係就猛食嘢。好似香港小輪（00050）尋日喺美麗華酒店大禮堂開股東大會，反應非常踴躍，筵開24圍唔夠坐，再臨時開多兩圍都唔能夠滿足需求，需要喺另一個房間再開多一圍半招呼遲到嘅股東，但呢一圍半因為事前冇預酒菜，最終只能食三文治、咖喱角等小食。有幾位小股東非常不滿，開始鼓譟，大鬧有冇搞錯。
絲絲問番小輪嘅負責人，以往公司預20至22圍通常都夠，有時仲有位剩，但自○八年開始突然多咗股東參與，舊年加到24圍都仲要突幾個人。而今年係以去年嘅經驗訂24圍，再有兩圍做後備，估唔到有成26圍仍然唔夠坐。絲絲喺現場都見到，小輪嘅公關已不停道歉，但都不斷畀人鬧，其實都幾慘。
負責人就承諾開會檢討預訂酒席嘅安排，而公司招呼股東食番餐呢個習慣已經實行咗廿幾年，絕對唔會因為今次事件一刀切以後唔搞。最後小輪向未能入席嘅股東每人送兩張餅卡，希望聊表心意。絲絲認為，股東會係要報咗名先至可以出席，雖然每年有人都會臨時唔出現，但既然事前知道大概人數，冇理由預得咁緊，希望小輪下年醒目啦。