孖妹S檔案：轉攻日股「瀛」升浪
近期不少朋友到日本旅遊，令到孖妹既羨慕又妒忌！依家7.5港紙就換到100日圓，相對大半年前要10蚊港紙先換到100 Yen，到日本消費變相25% off，孖妹豈會不心動？之但係港股今年唔多掂，年內僅升1.88%，我哋投資冇進帳又何來盤川！唉，眼看日股狂牛跑不停，今年就狂升逾四成，不時日日升2%，唔少投資大師都大跌眼鏡，好彩孖妹識得看風轉舵，一於轉玩日股，趕上這趟日「瘋」！
John：日興資產管理首席環球策略師John Vail
關：輝立証券外國股票部經理 關傑之
彩兒：今年日經指數升45.63%，當中港人熟悉的索尼（東證：6758）更升逾113%，日股會否太瘋狂？任職日本大型金融機構嘅你哋又點睇？
John：日經指數將可於兩年內升至20,000點！其實，今年日股升幅驚人，甚至超乎我們預期，主要是由於日本央行積極擴大量寬，令到當地經濟向好，不少日本股民亦已重拾投資信心！
圓匯貶值帶動盈利
關：日本央行多次放水救經濟，以低貨幣政策實施2%的通脹目標，圓匯於年內將跌至每美元兌105日圓，這令不少企業的盈利潛力上漲，反映日股仲有升值空間，現正向16,000點推進，一年內可上揚至18,000點！
高妹：連金融大鱷對沖基金Third Point舵手洛布（Daniel Loeb）都話睇好日股，現只是起步階段！我哋當然想搭順風車，但會蝕匯價喎！
中小型股可作短炒
關：事實上，股價郁得快過匯價，港人可留意日本中小型股票，較易受資金推動，可短炒一轉，便能減少匯價風險，而較冒險的投資者可考慮借孖展，利用較少資金參與日股，但風險高，股民能否承受則因人而異。另外，投資者亦可參照有錢大戶自行做對沖，買日股的同時亦沽日圓，惟日股已水漲船高，散戶不要過分樂觀！
John：目前日圓已破百算，短期下行機會不大，但今年末季應會再度下跌。
彩兒：日股當時得令，但邊類股票潛力較大？
關：最受惠的當然是出口股，可直接受惠圓匯貶值，如三菱（東證：8306）及日產汽車（東證：7201）已升逾四成，前景仍佔上風，其次是由經濟復甦帶動的消費股，同埋因通脹預期而受惠的金融股及房地產股，情況恰如去年香港樓市，投資者將紛紛追求固定資產保值！
John：除了出口股及消費股，券商股亦可受惠於日股強勢，成熱炒板塊之一。
高妹：買日股的佣金都幾貴，所以唔少人索性透過美國預託證券（ADR）參與日股，一來charge較低、一股有交易，而且流通量都夠大，亦同樣可享日股升值。
高妹 彩兒
若有料報畀高妹同彩兒或有嘢問，可電郵money.biz@opg.com.hk