Market Insight：內房股折讓吸引

早輪七國財長會議無將日本的2%通脹目標及無上限量寬計劃放入議程，市場解讀係七國財長變相默許甚至認同日本瘋狂放水的舉動，日圓兌美元愈跌愈急，上周五見103.21，創○八年二月以來收市最低，全世界都睇住破「百算」之後，YEN要跌到落110水平。

自從美國次按風暴席捲全球，聯儲局主席兼有「直升機師」之稱嘅伯南克，示範了鈔票貶值的副作用，就係令股票及資產價格水漲船高。年初至今，日經指數累積升幅46%，被視為日本科技股或創業板的JASDAQ更大升79%。

古勝冇點你 20/05/2013

萬里長空

除此之外，日本磚頭市場也蠢蠢欲動，睇番兩個領先指標，Topix地產指數（TPREAL）及東證房託基金指數（TSEREIT），年初至今累積升幅59%及32%，是近二十年日本央行多次量寬行動中罕見，可見今次投資者對安倍聯袂黑田的豪賭決心，信心相當爆棚。

內地放水機會提高

中國在今浪全球放水潮中，真正人做我唔做，相當有個性，人民銀行透過正回購抽走市場流動性，為寬鬆貨幣政策打修正球，結果匯價屢創新高，股市卻不振，年初至今A股升得0.6%，是韓股以外表現最差的亞洲股市。從三、四月經濟數據顯示，內地要保住7.5%經濟增長目標，下半年放水的機會應該高過進一步收緊銀根，事實由去年的情況可見，要支持經濟增長又同時嚴控樓價，在中國特色的經濟下，實在是相當困難。

近日，國務院宣布取消及下放117項行政審批項目，完成領導人換班後，中央開始釋出政府願意改革的姿態。特別留意樓市，《國五條》地方細則三月公布，「政策末班車」效應使三月樓價及成交急升，但到四月，房價未有因此放慢腳步，首四個月，內地商品房銷售按年大升六成，滬穗再現新地王，而內房股股價亦靜靜起革命，紛紛從三月份反彈，在在反映股市的投票機器，已預估在經濟及樓價調控之間，中央可能要作出取捨。

古勝估計，內房股第一季可能已見了今年低位，進入新一輪嘅上升周期，目前內房資產折讓頗吸引，市盈率平均都係6倍左右，即使係「Big 5」嘅中國海外（00688）、華潤置地（01109）、碧桂園（02007）、龍湖地產（00960）以及世茂房地產（00813），講緊亦不過係7至11倍。而這些內房企業於一三、一四年的銷售目標，大都能夠保持增長，計落比起等政府打救的基建、資源及內需股確實吸引，至少我們看到「磚頭市場」嘅需求，在政府措施阻攔下依然不缺。

銷售表現尚算不俗

講開「Big 5」，筆者認為以世房最啱心水，截至四月底完成183億元（人民幣‧下同）銷售，已經達到全年550億目標的三分之一，係同業中完成度比較高的一間。展望五、六月，氣氛好加上推盤數目較多，市場估計可以錄得單月60至70億、及70至80億元單月銷售數字，現價市盈率唔夠8倍仲有近三成折讓，「Big 5」中佢最抵買，不妨留意。

另外，近期熱炒的新股同仁堂國藥（08138）珠玉在前，相比之下，上星期全配售上市嘅華章科技（08276），表現確係得人驚，開5元後抽上8.5元（港元‧下同）高位，再撻番落2.05元收市，高位衝入去唔走即輸七成六。

華章從事造紙業、冶金及電力行業工業自動化系統和污泥處理產品的研發及產銷，以8.5元計，上周四最輝煌一刻，市值23億元，未知天價掃落去的股市勇者，到底知唔知佢今年六個月先賺得625萬？

新股表現榮辱互見

新股一向係正嘢分唔到，揩嘢派到通街都係，這類全配售公司猶如私人派對，股民要賭，不如過大海，至少輸咗錢，都有餐食有免費房住吓，好過做咗大戶點心，輸完仲一肚氣。

古勝