依家科技一日千里，可以將好多天馬行空嘅念頭變成真實，甚至變成一門成功嘅生意。好似電動汽車公司Tesla嘅創辦人兼CEO馬斯克（Elon Musk）咁，佢嘅電動車生意最近就開始進入「收成期」喇。
Tesla生產嘅電動車喺歐盟市場大受歡迎，所以早喺上年畀歐洲嘅買家預訂時，反應已經非常熱烈；而聽講下一個月就係Tesla交貨嘅日子，呢段時間Tesla聲名大噪，連帶股價近兩個月都馬上翻倍，馬斯克真係可以話係名利雙收。
不過馬斯克並無因此就滿足，佢更加繼續睇好呢門生意，決定透過直接買入Tesla的股票，用個人身份再向公司注資一億美元，擴展電動車嘅生產線，以應付將來亞洲區嘅需要。
另外，透過之前計劃由高盛發行270萬股可換股票據，一八年到期，估計可集資8.3億美元（約64.74億港元）。投資者都（目及）實馬斯克呢趟舉動，估計咁重本泵水入電動車，似乎係向股東及市場人士證明自己對電動車未來銷售成績信心十足。
講真，絲絲都聽講，依家開始香港都可以預訂Tesla嘅電動車，不過同歐洲一樣，都係要等一年先可以收車。