併購後點樣將兩間公司整合考起唔少高管，若兩間公司規模有番咁上下自然更複雜，講緊嘅係嘉能可（00805）收購Xstrata嘅世紀併購案，月初宣告完成後，新公司嘉能可Xstrata尋日召開股東會重選董事，但原主席龐約翰（John Bond）因八成票數反對而未能重任，之不過，佢之前已講過唔想再做主席，一班股東亦樂於成人之美。公司董事會即時發通告，委任Tony Hayward做臨時主席至新主席上任為止。
龐約翰於一一年加入Xstrata，之前佢做過滙控（00005）主席同Vodafone嘅主席，連佢都唔啱股東心意，市場估計新嘅人選真係有排搵。講真，嘉能可Xstrata新公司合併後一直被指立立亂，新公司成立嘅一個高級管理團隊，一共有十四人，但十二個係嚟自嘉能可，得兩個嚟自Xstrata，家陣連龐約翰都走埋添。
龐約翰首度公布有意辭任Xstrata主席之前，Xstrata董事會曾建議，向大約七十個管理人員，派發約1.44億英鎊（約17億港元）嘅花紅，結果被一眾投資者反對；最終董事會讓步修改咗方案，花紅以股份形式派發，並要同管理層節省成本嘅表現掛鈎。唔知龐約翰係咪意興闌珊，加上已71歲，所以晨早已表明唔想連任，休息歎番吓好過。
同日辭工嘅仲有Steve Robson，因為佢自動提出辭職，所以連重選都無參與。除咗一眾董事，其他管理層同樣萌去意，前行政總裁Mick Davis話到明唔會做多半年再交棒，前財務總監Trevor Reid亦指唔會喺新公司任職，有傳佢兩位打算成立私募基金。
余詩韻