唔經唔覺，羅嘉瑞做咗上市公司商會主席就嚟四年，到今年六月將會功成身退，屆時喺上市公司商會會員周年大會上將會推舉出新主席。聽聞羅嘉瑞早前已經密鑼緊鼓搵緊接班人，唔知有咗心水人選未呢？
睇番依家上市公司商會嘅核心成員，該會常務副主席係和黃（00013）副集團董事總經理周胡慕芳，另外有四名副主席，包括兩名「朱太」﹕金利豐（01031）行政總裁朱李月華同朱何妙馨，另外兩名副主席就係爪哇控股（00251）執行董事呂聯樸、同晶門科技（02878）主席辛定華。
究竟羅嘉瑞嘅接班人係商會依家嘅副主席，定係其他人，六月就有分曉。
講真，近年上市公司商會地位愈來愈高，政府、證監會同港交所都要「畀面」，有乜改革大計都會諮詢吓佢哋意見，所以主席呢個位好重要，一來要有江湖地位、有知名度，二來又要熟悉上市公司運作，最好對監管都有認識，真係唔易搵。
會員多大藍籌中資企
二○○二年時，上市公司商會因為轟動一時嘅「仙股事件」而成立，喺過去十幾年，會員數目愈來愈多，包攬咗多家大藍籌、中資做會員，而羅嘉瑞喺二○○九年起出任主席，按規定主席任期不可超過四年。