絲絲講場：馬蔚華榮休 寫書爆料拍戲
被視為招行（03968）靈魂人物嘅馬蔚華，終於宣布因為年齡問題正式卸任行長職務，開始享受退休生活。絲絲聽講，馬行長早有計劃，如果有日退休，就準備着手出書，寫有關海南發展銀行當年點樣成為內地第一間倒閉銀行嘅古仔，雖然未知本書幾時面世，不過影帝陳道明已經開聲，只要馬行長寫完，佢就會搵人拍電影，仲會自己擔綱主演。
出書寫海發行盛衰
今年年頭開始，內地金融圈開始傳出馬行長會離開任職接近15年嘅招行，早前佢接受外電訪問時，都唔介意回應退休嘅問題，強調自己將招行呢個仔辛辛苦苦養大，用咗佢全部心血，如果有日離開招行，一定唔會過檔去第二間銀行同招行打擂台。至於退休生活，佢話已經諗好咗要寫本關於海發行嘅書，相信內容會「驚心動魄」。
田惠宇接任掌招行
講起海發行倒閉內幕，馬行長絕對係權威，事關入主招行之前，佢曾經出任人行海南省分行行長，受命解決海發行破產清理工作，可以話喺親眼見證住海發行由盛至衰，絲絲相信本書完成後一定會非常精彩，難怪連中國影帝都要搶住預約劇本。
招行行長個位，將由田惠宇接任，田惠宇現為建行（00939）零售業務總監兼北京分行行長，屬於海歸派高管。
余詩韻