炎夏將至，絲絲好心急要減肥！港大電子金融服務榮譽助理教授徐燦傑（Prof. J）好驕傲咁同絲絲講，成功減肥，之不過，絲絲睇完佢份餐單，只可用藝高人膽大嚟形容，真係唔夠膽跟，好驚減唔到肥之餘，整壞個身體添。
徐燦傑嘅減肥方法，竟然係每朝食即食麵！佢話，依家佢慣咗每朝都會點一個豐富嘅早餐，有煎蛋、火腿、即食麵等，但重點係麵只食一半；之後就唔食午餐，只係揀飲齋啡或普洱茶；到晚餐就食一啲清蒸餸菜同半碗飯，配合作息定時、同埋做瑜伽。
結果，佢用咗約三個月，就由超過200磅減到依家約170磅，唔單止面尖咗、肌肉結實咗，更重要係肚腩細咗，魅力指數立即提升。
係人都知食太多即食麵會致肥，營養師都教大家，早餐好緊要，一定要食得多兼有營養，中午嗰餐都可以食好多。Prof. J呢個方法你夠唔夠膽試？
絲絲奇怪Prof. J點解無端端減肥，唔通好事近？佢就無透露，反而就話近排好忙，原來佢忙緊關於中學文憑試（DSE）嘅研究，都幫佢減唔少磅。個研究係想了解吓第二屆DSE考生對升學同埋出路嘅普遍心態，結果包括逾六成受訪學生唔清楚家長會否支持重讀DSE、學生揀私校重讀最緊要睇教師學歷等。佢話希望研究可幫助大家多啲了解青少年嘅升學「心事」。
余詩韻