絲絲講場：細券商唔停咁摺
雖然近期股市好似有番少少起色，但股票行停業消息仍然不斷！一連兩日，港交所（00388）網站都披露有證券行停止營業嘅消息。好似前日（2日）港交所至收到大一投資停止營業嘅通知。唔夠24小時，尋日（3日）港交所又接獲福而偉資本通知在交易所暫停營業，直至另行通告為止。
翻查證監會資料，大一投資擁有俗稱「一號仔」嘅證券交易牌。福而偉就除咗一號仔牌外，仲有九號牌即資產管理。
蔡思聰：生意唔易做
證券商協會前主席蔡思聰對於一連兩日有「行家」唔做，一啲都唔出奇。佢話好多人以為股票行易做，點知做做吓至知「錢都唔係咁易執！」開間股票行，做埋孖展成本約一千萬，但呢行本錢少根本好難做到大生意，因為佣金鬥平鬥到焦頭爛額、人客又流失去銀行，最重要係太多衍生工具，啲客對股市冇晒信心！經營股票行仲要驚畀客人同伙記走數，又驚自己頭寸唔夠，分分鐘賺埋唔夠蝕，所以佢話，將一千萬元攞去買樓肯定更加有「着數」！