絲絲講場：恒生八十歲金曲悠揚

唔經唔覺，原來恒生銀行（00011）今年已經八十歲，絲絲尋晚有幸出席佢哋八十周年慶祝酒會，期間絲絲聽到一段音樂旋律，似曾相識，哈哈！原來係細個成日聽嘅廣告歌「小莫小於水滴，漸成大海汪洋……」，當場勾起絲絲兒時一代港人奮鬥嘅集體回憶。

絲絲喺晚會除咗見番好多老友之外，主人家恒生仲請咗敲擊樂團助興，可能係想寓意鼓聲躍躍、業務蒸蒸日上喇！

話說尋日絲絲好早就到咗，咁就周圍搵老友吹水喇，突然間鼓聲隆隆，原來係敲擊樂大師龍向榮博士帶領嘅樂團表演敲擊樂，佢哋走落台嘅時候，就連幾個銀行大班好似滙豐香港區嘅總裁馮婉眉（Anita）咁，都忍唔住加入埋一份敲咗幾吓。

當鼓聲稍為靜落嚟，絲絲幫老友拎緊杯嘢飲嘅時候，差唔多響遍成個會展嘅鼓聲又再響起，見到主人家恒生董事長錢果豐博士同恒生副董事長兼行政總裁李慧敏（Rose）等人浩浩蕩蕩咁進場。

呢個時候，絲絲梗係唔執輸，走上去同Rose握手、寒暄番幾句啦！

余詩韻