絲絲講場：許淑芳評股繪畫同樣精彩
唔知大家仲記唔記得，以前瑞銀有位好出名嘅公用股分析員許淑芳（Alice Hui），喺金融海嘯前劈炮唔撈，轉行做咗畫家，依家擅長畫自創嘅水晶玻璃畫，希望喺畫壇有自己嘅風格。正所謂精彩人生由我創，許淑芳又係一個勵志嘅例子！
許淑芳當年仲喺里昂證券時，憑藉分析長實嘅報告打響名堂，佢近排同絲絲話當年，有次長實前高層周年茂講吓新項目，許淑芳計一計數發覺呢批新項目可以令長實嘅市盈率平晒，亦即係話股價有得升，佢唔瞓都要出埋份報告唱好，結果就唔使多講啦！
創作之餘不忘慈善
許淑芳依家喺銅鑼灣有個畫廊，絲絲見過佢畫嘅畫，真係好靚好閃，絲絲當然只係得羨慕兩隻字，早知細細個都學吓畫畫啦！許淑芳喺金融界咁多年，依家梗係生活無憂，畫畫之餘都不忘慈善，佢話會將賣畫嘅收入，捐一部分畀慈善機構。許淑芳嘅勤奮同善心，都好值得時下年輕人做榜樣嘅！