日本有「渡邊太太」，內地都有「中國大媽」，呢班掌管家庭理財嘅投資散戶雖然唔太專業，未必識得金融理論，甚至可能分唔清投行同銀行有咩唔同，但勝在人多勢眾、行動一致，資金規模龐大到足以左右市場走向，而最近華爾街大鱷沽空黃金嘅操作，就因為半路突然殺出嘅呢班中國師奶兵團而初戰失利。
早排喺高盛等投行唱淡下，現貨金價一度急挫一成幾，不過未等國際炒家從容布局，突然間殺出一班中國大媽，佢哋湧入金舖，見乜要乜，有乜買乜，短短十日左右就用咗千幾億元人民幣，狂掃三、四百噸實物黃金，相當於全球黃金年產量嘅一成，加埋有同樣鍾情黃金嘅「印度大媽」們共同配合，搞到金價即時企穩反彈，最後連高盛都要投降，改叫客戶停止再沽空黃金。
呢兩日內地微博上面「中國大媽」呢個詞簡直紅爆，有網友話，以嗰班讀MBA出身嘅華爾街精英，又真係好難明白呢班中國師奶兵團掃樓、搶鹽、掃奶粉同狂炒ST股嘅邏輯，同佢哋對賭，真係分分鐘殺你個措手不及。