三月「兩會」過後，內地財金官員仍不時傳出人事調動嘅消息，今次輪到一向極力捍衞上海利益嘅上海市金融服務辦公室主任方星海，市場傳聞佢已經確定會上調中央，好大機會做同樣係今年先至上任嘅中證監主席肖鋼嘅助理。
方主任過往幾年一直積極推動國際板籌備工作，有內地金魚缸中人士估佢調任之後，可能有助國際板加快推出。之不過，都有人覺得喺內地「屁股決定腦袋」，佢調去中證監，反而可能國際板更加推出無望。
方星海一向敢言，出親公眾場合捍衞上海利益不遺餘力，香港由魚缸股民到財金官員對方主任當然唔會陌生。事關早年佢老哥曾經講過，上海中長期目標係同紐約、倫敦比較，言下之意暗指香港同上海比未夠班，又話香港建人民幣離岸中心係「一個草率嘅主意」。
雖然近呢兩年佢講嘢謹慎咗，冇再好似之前咁暢所欲言，不過，以前呢啲踩低香港，抬高上海嘅金句相信一眾港人都仲印象深刻。
今次最早傳出方星海將調任中證監主席助理呢個消息嘅，係一個叫「藍鯨財經記者內參」嘅微博帳戶，號稱係千六名記者嘅共同帳戶，至於最後係咪會成為事實，就真係要拭目以待喇。
余詩韻