內地五一假期，香港獨力撐住，適逢期指結算日，成交縮水是預期之內，但縮水幅度又確實幾大。放假前A股表現不振，上周五滬綜指收報2,177點，今年以來A股累跌4%，再次蟬聯全球主要市場最差的一個，同期美股升逾一成，而日股升約三成，港股跟着內地走，若大家非Global炒家，見到啲數字真係唔開胃。
人行上周進行正回購操作，上周二及周四共向市場收緊280億元人民幣流動性，金額較前周減少，市場未見反應，似乎繼續受到經濟數據、季績等影響，靜待A股轉勢的投資者惟有繼續默默等待。
幾隻較熱門的A股ETF當然跟住走勢向下沉，股價跌得最多的是安碩A50（02823），昨日收報10.14元，較二月高位跌16.5%，南方A50（02822）排中間，挫約15%，華夏滬深三百（03188）則累跌12.3%，跌得最少。港股同期跌幅唔夠6%，諗住買A股賺多啲，到頭來蝕得仲多。
本港上市的9間內地銀行公布季績，首季盈利增長介乎8至20%。建設銀行（00939）首季賺596億元人民幣，按年升16%，較預期佳，期內非利息收入增長21%，表現較強勁，成本對收入比率跌1.31%，資本充足率13.63%，核心資本充足率10.92%。
幾間大行在建行公布業績後齊齊唱好，公司股價連升四個交易日，昨日成為升幅最大的內銀股，而且買盤唔弱，四月中見底後已升穿中線下降通道阻力，但值得留意的是，股份沽空並唔少，昨日亦是沽空最多的股票，高達4.08億元，佔股份成交23.62%。相信連升後或有回吐壓力，可待其回吐後才再入場。
一飛