香港係商業社會，但同時亦有唔少非牟利機構（NGO）為社會出力，可惜佢哋經費成日唔夠，有見及此，花旗香港就幫NGO諗計仔，舉辦咗個大學生去社企暑期實習嘅計劃，為期四至八個禮拜，學生做滿160小時實習，就可以賺到6,000元人工，即係時薪37.5元，比起五月一日起實施嘅最低工資水平30元，算係唔錯o架！
計絲絲話，助人為快樂之本，金錢回報都係其次，所以個實習計劃好快得到各大專院校同學仔踴躍參與，收到超過250個報名，最後大會揀選出60位商科學生，佢哋會到34間NGO進行實習，服務範疇包括照顧長者同殘疾人士，仲會推動環保添！
尋日絲絲出席咗實習計劃嘅開幕儀式，同場仲有花旗集團私人銀行董事總經理暨香港市場總經理盧偉明，連財經事務及庫務局局長陳家強都嚟捧場。