今時今日好多電訊商為咗搶年輕客戶，扭盡六壬將自己的品牌年輕化，內地固網老大哥中電信（00728）當然亦唔例外，為進一步發展旗下年輕品牌，近日傳出會與內地知名嘅歌唱節目《中國好聲音》加強合作，大搞娛樂營銷。
其實中電信拓展年輕人市場非常「給力」，去年開始就建立「天翼飛Young」嘅品牌移動服務，今次同《中國好聲音》合作，就係透過《天翼飛Young中國好聲音》嘅巡迴演唱活動，宣傳「天翼飛Young」品牌。
中電信除透過贈送演唱會門票作為促銷手段外，亦會將相關內容轉播至中電信旗下嘅3G網絡，變相提升中電信喺多媒體內容嘅競爭力，內地甚至有分析話，若今次合作成功，將成為內地娛樂營銷嘅成功個案，為中電信日後拓展手機與網上音樂服務打好基礎。
話時話，由浙江衞視製作嘅《中國好聲音》去年除成功打破內地收視紀錄外，亦成功吸引港台兩地觀眾關注，中電信若能好好把握，相信亦會對提升自己喺大中華市場嘅品牌形象有幫助！