Market Insight：內銀股未成氣候

唔少當炒二三線股已經見「回回哋」，明日又放假，今日個市睇怕都係靜，明日內地公布四月製造業採購經理指數，由早前滙豐編製的麻麻哋，市場估緊會由三月50.9跌到50.7，如果再差啲，只怕滬綜指復市未必守得住今年低位2,165點，宜小心。

《一手住宅銷售條例》開始實施，以往賣樓廣告中例必出現的外籍美女同法國宮廷背景，唔知會唔會完全絕迹。發水進一步受限制，加埋交易透明度進一步提高，早前雙辣招加雙倍印花稅已令成交大減，樓價有明確見頂回落迹象（為促成成交，業主降價幅度已高於買方要付雙倍印花稅（DSD）的代價），估計新盤由賣方主導，漸漸到買賣雙方較均勢局面。

古勝冇點你

萬里長空

一手新例需時適應

地產商中短期內，要繼續賺到盡的難度已大增，本地幾隻重磅地產股，昨日均逆市向下，長實（00001）、新鴻基地產（00016）、恒地（00012）、信置（00083）以及新世界（00017）跌幅介乎0.5至1.5%。

瑞銀引述美聯集團（01200）預測，今年本港樓價要跌5至10%，該行估計雙辣招加埋DSD夾擊，估計未來兩個月新盤交投，會因為發展商需要時間適應新例，進一步減少，但古勝仲係睇好擁有較多收租商用物業，以及在內地有新盤推出平衡本地套現金額減少的長實、新地及新世界。

內銀股季績陸續曝光，「工農中建」四大國有銀行，按季盈利分別增長29.9%、88%、20.4%及70.3%，按年計都有12.1%、8.2%、8.2%及15.7%，由季度成績表，四大行表現的確比市場估計好，概括原因包括淨息差收窄少過估計，較高的利息收入，以及非利息收入按季反彈。到底四月中的低位，會唔會係內銀股一次重要轉捩點？

渣打已展現吸引力

客觀睇，內銀估值便宜，反而係政策的客觀因素左右，要出現報復式反彈，先要睇連升五季的不良貸款，會唔會在未來一兩季開始回落，以及人行為寬鬆政策打修正，完成正回購收水行動至掂。

講開銀行，渣打集團（02888）年初派完份破紀錄成績表之後，估唔到反高潮，高見215元之後，掟番8.7%，現價196.3元，去年賺近半百億美元，亞洲佔渣打稅前收入六成，其特色是不依重單一市場，香港貢獻最大的也僅佔總稅前收入近兩成，無疑是一大賣點，可惜形勢比人強，尤其經歷一二年國際銀行股大反彈，一三年歐美銀行股已見升幅放緩，加埋日本金融機構今年超強吸金力，連續十年業績錄得增長的渣打，被大孖沙視為雞肋確係有些少始料不及。

渣打最近同大行透露的營運指引，今年首兩季業績對辦，收入維持按年雙位數增長，街外估今明兩年純利57.8億美元及64.1億美元，市盈率10.7倍及9.7倍，今明兩年預期息率3.6厘及4厘，相比內銀股，古勝有較大信心，早前股價在187元可能已見了中長期低位，趁現時反彈有限，估值唔貴，業績後等機會的應該可以放心出手。

基金股波動要小心

雖然昨日恒指波動唔大，但部分基金愛股卻現大幅波動，例如廣州藥業（00874）擬於四川災區起廠嘅動機被質疑，股價急挫8.4%；天津發展（00882）股價則無厘頭急跌9%；冠捷科技（00903）受盈警消息打擊股價跌10%；天能動力（00819）則被內地傳媒報道涉污染問題，股價下跌8%。

本來，呢幾隻股之間冇咩大關係，但成交都唔細，諗起呢期指數確已累積一定升幅，須提防基金大戶乘機減持股份獲利，加上如今市況交投淡靜，博反彈要提防落車難，都係一動不如一靜，等假後再作打算。

古勝