絲絲講場：庫克咖啡 激鬥股神午餐價
愈嚟愈多名人，鍾意將自己嘅時間，用拍賣形式籌款做善事，最典型嘅有與股神巴菲特午宴，最近蘋果公司嘅行政總裁庫克，都用呢個方法拍賣飲咖啡時段，反應相當之唔錯，推出冇耐，已經bid到56萬美元（約436.8萬港元）！假以時日，話唔定同股神午宴價有得「揮」。
籌得善款捐人權組織
庫克透過一個叫Charitybuzz嘅網站，拍賣呢個「一小時約會」，叫價由前日嘅3.7萬美元，升到尋日嘅56萬美元，距離截止日，仲淨番唔夠十八日。絲絲仲聽講，個拍賣嘅意向價係5萬美元，所有嘅捐款都會捐畀一個人權組織；而且中咗拍賣嘅人，可以帶一個同伴一齊去，及要嚴格遵守拍賣條款上有關禮貌及尊重嘅要求。依家個價bid到56萬美元，已經高過意向價好多，但同股神舊年慈善午宴得標價345.6萬美元相比，庫克個身價仲有啲距離。
iTV停滯傳因海信挖角
絲絲八卦咁諗，唔通庫克就係掛住搞呢次拍賣，而遲遲未出部「iTV」？原來唔係，有傳聞就話，蘋果8個核心工程師畀中國海信集團嘅北美研發團隊挖角，所以拖慢咗個研發期喎。不過，如果呢個中國企業搶人搶贏蘋果嘅消息屬實，都應該算係「轟動」嘞！
講番個網站，有幾個不同嘅bid一齊進行，好似荷里活電影明星羅拔迪尼路（Robert DeNiro）同基斯漢斯禾夫（Chris Hemsworth），亦有參與呢次拍賣，前者可以同佢喺下年嘅美國紐約電影節會面，後者更可以同「雷神」同場演戲！兩項拍賣暫時叫價3,000美元樓下，都值得一Bid﹗
余詩韻