絲絲講場：海爾楊綿綿一次走三步
中國經濟無疑係崛起咗，但軟實力仲差一大截，中國企業品牌係典型例子。內地好多企業近年堅持「走出去」，海爾集團（01169）總裁楊綿綿，唔單只要將品牌「走出去」，仲話要走三步添！
楊總咁多年嚟一直努力將海爾發展成全球第一嘅白色家電品牌，堅信喺出口市場要有品牌先至有價值。「走出去」係內企嘅集體目標，楊總話海爾一走就要走足三步，即「走出去」、「走進去」（喺外國市場立足），然後「走上去」（喺外國做到人人喜歡）。至於點樣做到，楊總話「品（牌）」字三個「口」，所以各方口碑一定唔少得。
陳世昌分享「金」信譽
講到口碑嘅重要性，相信周大福（01929）執董陳世昌第一個贊成，陳總話最記得八十年代，當時香港賣嘅金，純度仲係「無王管」，有唔少金條純度都有報假，但因為周大福堅持黃金嘅純度，所以嗰時當舖收黃金就有兩個價，分周大福價同普通店價，時至今日佢依然堅持買金同時係買一份信譽。但內地造假情況依然令人吃驚，陳總都好痛心話最怕假冒者做壞品牌，打官司都可能會贏官司但輸咗錢，惟有寄望內地搞好產權保護。