金占士最近聽到一個古仔，涉及一家已賣盤嘅公司，話說呢間公司上市嘅時候，當時傳聞話隻股上市反應麻麻，個老細搵咗個幾有名氣嘅老莊家，幫手認咗部分股份，一直坐到依家，而個莊家開出嘅條件，就係間公司上市滿一年可以轉手，隻殼一定要交畀佢負責搵買家。
到可以賣盤嘅時候，個老細就自己同佢嘅老友傾掂數，只係用咗唔夠一個月時間，就由停牌到完成轉手，成單刁無視幫佢坐貨咁耐嘅莊家。
最後每股折讓幾成賣咗畀人，嗰位莊家想搵人講數又摸門釘，所以好鬼畀人起咗飛腳，坐咗一年貨得個桔。
金占士仲聽聞，位莊家原先度好晒，諗住將隻殼賣畀一位老叔父，點知咁搞法，公司復牌大跌，除咗自己批貨嘅市價即時水瓜打狗，仲唔知點同叔父交代。
金占士