絲絲講場：狄勤思為理想捨薪
港交所（00388）前上市科主管狄勤思，今個月初過檔財務匯報局做行政總裁後，絲絲尋日同佢茶敍，好奇財匯局嘅人工同港交所應該「差一截」，點解佢肯「減薪」過檔呢？
入財匯局人工打三折
佢就自爆話佢喺財匯局年薪390萬元，其中八成半係「保證」，其餘一成半係「浮動」，即所謂視乎表現嘅「花紅」。
睇番狄勤思嘅「前度」甘博文，去年度薪酬連花紅袋360萬元，換言之，狄勤思人工已較前任財匯局CEO為高。
不過，睇番狄勤思舊年喺港交所連底薪、花紅、獎授股份、福利等等合計袋成1,200萬元，390萬元只係三成左右。
熱愛監管 有三大目標
不過，睇嚟狄勤思唔係太介意，佢話自己一向都做監管機構，好喜歡監管工作。佢喺財匯局有三大目標，就係加強投資者保障、增加財匯局認受性、同鞏固香港國際金融中心地位。
財匯局依家同政府傾緊獨立審計監管改革，狄勤思未來肯定大把工作做，財匯局主席潘祖明為咗減輕狄勤思工作負擔，開始招聘副行政總裁，希望未來幾個月可以返工。
余詩韻