Market Insight：航空股隨時起飛

值得留意係，升跌股份比例，由周三71比29，回到52比48的均勢，相信同上星期低位21,423點起步的反彈，開始逼近一些技術阻力所致。

滬綜指困在2,165至2,250點之間，快三個星期，昨日滬綜指跌19點報2,199點，留意到人民幣同業拆息近排異動，隔夜息由上周初2厘升到昨日的4.29厘，一星期亦由2.9厘左右，升至昨日見5.02厘，創埋十三個月新高。到底係川震影響抑或人行的收水行動影響？水緊情況短期對A股唔多有利，一日滬綜指升唔穿2,250點阻力，暫時都未可以當轉勢。

放大圖片

放大圖片

A股缺乏炒作主題

古勝近日同位A股基金經理閒談，佢直言今年雖然已經踏入第二季，內地政局塵埃落定，不過佢話仲未搵到今年A股有主題去炒，尤其低處未算低的估值，藉口用得太多，經已唔足夠說服客戶落注。

客觀睇，近日電力需求增幅放緩，意味着工業及出口業復甦似有還無，商業銀行不良貸款連續五季上升，加埋主席習近平的反貪，令一眾奢侈消費及餐飲業門前冷清。

唯一較醒神的係同民生息息相關的消費板塊，例如蒙牛乳業（02319）死對頭伊利，A股股價由年初累積升幅三成九，叻過晒啲茅台同五糧液，估計季度業績仲維持到兩成五至三成增長，主要係多得高檔產品比例增加以及原乳價格尚算平穩所致。

蒙牛係在下愛股之一，但過去年多時間的表現真係令人失望到極，股價長期在20至24元之間浮沉，中糧集團入主變成半隻國企之後，仲未威過，主要係賓架對公司調整產品結構改善毛利的進度慢有抱怨，或者現價可以揸住，但要加注睇嚟仲未係時候。

地溝油有正面用途

TCL多媒體（01070）畀人隊到開巷，跌9%收報6.27元，但講來講去，都只係將今個星期的升幅跌番出街。首季業績少賺三成六，純利1.96億元，查實去年有筆一次性項目，今年無，所以先出現業績倒退假象，撇除非經常項目，季內銷售額及核心盈利分別有23.6%及18.8%增長，唯一要彈係，其面板短缺影響毛利率跌1.8個百分點至16.2%。

不過，從分析員會議上得知，情況在第二季已好轉，大行估全年賺10.4億元，12.7倍市盈率，貴創維數碼（00751）少少，但相信這份業績唔足以令今輪升浪逆轉。

最近睇到東航（00670）試用內地特產「地溝油」轉化生物燃料試飛的新聞，假如有朝一日，真係有機會全國性使用，肯定係人民福祉，「地溝油」搵到一個比炒菜更佳的用途。

昨日內地減成品油價，分析預測話航油好可能短期跟減，對航空股有利。古勝早前錯估形勢，怕H7N9禽流感疫情對航空業的傷害有機會同○三年沙士相提並論。不過，由近日疫情在社區擴散情況與途徑，以及急跌後已經收復失地的股價，睇嚟在下似係杞人憂天。

受惠人幣持續升值

不得不提，燃料成本外另一項對航空股有利因素——人民幣，人民幣匯價昨日兌美元見過6.1671的匯改新高，今年累積升值1%，與去年七月比較累積升值3.4%，如果持續升值的話，對航空股匯兌收入大有好處。

撇除H7N9疫情對第一、二季業績的影響，從市帳率比較，東航及南航（01055）都處歷史低點，一三年預期市帳率分別為1.11倍及0.89倍，同沙士至今的歷史中位數1.37倍及1.29倍比較，折讓19%及31%，部分有利條件已出現，看來距離啟航，只差疫情受控以及搭客量回升數字出現。

古勝