員工流失率受好多因素影響，人工好唔好、有冇機會升職、工作挑戰性都係主因，有調查就發現，公司CEO支持度，都令員工想唔想留低。
最近有求職網站公布咗一三年最佳CEO排名，facebook、谷歌、蘋果公司、半導體製造商高通同埋網上書店亞馬遜嘅CEO都榜上有名。
喺咁多間大公司入面，fb嘅CEO朱克伯格得到最多支持度，99%員工都力撐佢！而美國半導體製造商高通同埋谷歌嘅CEO就得到95%支持度。
不過舊年排第一嘅CEO，蘋果公司嘅庫克就由97%跌到去93%，跌咗成17名咁多呀！
咁究竟朱克伯格點樣得到99%支持度嘅呢？絲絲聽講，有好多受訪員工都話，朱克伯格係一個天才，每次同佢傾偈都可以學到好多嘢。
佢地仲話公司透明度好高，員工都清楚公司嘅最新發展，而且工作自由度好大，員工可以揀自己嘅拍檔，總之喺fb做嘢好開心咁話！絲絲聽講朱克伯格最近仲搞埋政治，提議放寬移民政策，吸納IT人才，唔單止員工支持，就連一班硅谷猛人都力撐呀！
余絲韻