絲絲講場：王傳福玩體操試車
自從美國國會恢復咗對電動車嘅補貼之後，有生產電動車嘅比亞迪（01211）接訂單都接到手軟，好多美國大機構都要落order買佢哋嘅K9電動大巴士！尋日加州州長布朗仲同比亞迪嘅美方高層Micheal Austin一齊去到深圳嘅比亞迪嘅總部實地考察！
引體上升測試扶手
絲絲聽講，比亞迪接到好多大機構嘅訂單，除咗洛杉磯國際機場之外，仲有長灘市價值1,400萬美元嘅訂單。所以公司喺洛杉磯附近買咗間工廠，方便喺當地生產。
尋日布朗同Micheal就去咗深圳，主席王傳福單唔止親自帶佢哋參觀電動巴士車廠，仲同布朗輪流喺電動巴士嘅鋼製扶手度做吓引體上升，話要用自己嘅重量測試一下扶手嘅鋼水夠唔夠實淨喎！睇嚟扶手無問題，但王生小心條腰骨呀！