自進入第二季後，美元就出現調整。背後理據係近日美國數據開始無之前咁標青，連同上周新增職位減少、PMI開始轉差、零售銷售都未如理想，雖然未至於睇淡美國經濟，不過明顯無之前咁樂觀。
塞浦路斯事件叫做告一段落，英國數據如PMI、工業生產又比預期為好，甚至有研究機構發表報告，話英國第一季GDP經濟增長有0.1%，可能避免出現三底衰退。
英鎊表現強勢，不經不覺由1.48水平回升至1.53水平。如果英國GDP重新有正增長，相信市場將降低未來擴大量化寬鬆的預期，英鎊將進一步反彈。不過，筆者認為英鎊只係偷位偷時間借勢反彈，係典型升得慢跌得快嘅格局，後市唔可以太樂觀。
睇番英鎊由今年一月高位1.63跌至1.48水平，如果用黃金比率反彈38.2%計，阻力就係1.542，1.545至1.55可能就係今次反彈的頂部，預期升穿1.565機會不高。若果有機會衝至1.5450上方，相信將會係食英鎊跌勢第二浪的良機。
GMO CLICK環球通副總裁 陳健豪