一年一度嘅本地賽馬盛事——港交所盃喺前日（14日）已經曲終人散，不過原來仲有段小插曲。
話說港交所盃安排喺當日第九場賽事，名人許晉亨同李嘉欣名下嘅愛駒「一寶」有份出賽，「一寶」嘅英文名係「Charles The Great」。
大家都知，港交所行政總裁李小加洋名係Charles，難得港交所盃有同自己英文名字一樣嘅馬出場。聽聞李小加都忍唔住落咗少少注「捧自己場」，而同場嘅嘉賓好多更加起哄話要「買Charles贏」！
有馬迷同絲絲講，「Charles The Great」都係熱門嚟o架，正當大家齊心唱好「Charles The Great」，梗係望佢跑第一喇，最後卻爆出冷門，由8號嘅「帝國勇將」跑出第一，「Charles The Great」就輸咗個馬鼻只跑第二，一眾小加總裁fans即時「心碎」！
事關如果「Charles The Great」跑第一，就會出現「Charles Li」頒獎畀「Charles The Great」嘅經典場面！不過，跑馬嘅嘢梗係有贏有輸，絕對無損當日各人嘅興致！
余詩韻