期指觀瀾：開好倉仲未係時候
上周港股受制於10日及20日線阻力，藉內地經濟數據欠佳以及日股回軟，昨日恒指及國企分別跌1.4%及2%，收報21,772點及10,440點，其中國指即市低位10,394點，跌穿了四月五日低位10,407點，確認短期反彈浪失效，市場對中資股情緒極之悲觀。
昨日幾乎無操作空間畀期指即市炒家，早市開於22,018點，好友推上去22,061點後無以為繼，淡友藉內地GDP數據差過預期的消息，很快將交易區推至21,800點樓下，十點十分之後，一直壓制在21,700至21,805點的百多點內悶到散場。
上周港股以低成交下累積362點升幅，沽空比例縮減，令挾淡倉機會減少，各技術指標顯示未能配合好友反攻，博好倉唔穩陣，只係估唔到周一復市，單單一個交易日幾乎嘔凸。筆者維持上周建議，技術上，中期大市受制於20日線，二月初開始一浪低於一浪形態基本無變，除非現貨指數企穩20日線22,161點樓上收市，走勢才有些少希望轉好。截至十時，夜期跌幅擴大。
但追沽都要有相當大決心，二、三月的月線圖上已高開低收，今個月要扭轉局勢，月線圖指數要上番去22,299點樓上，當然要先過20日線這關，否則仲係唔買得住。
John Mullen