Market Insight：房託基金避險之選

近期環球基金陸續把資金調回風險資產，美日股市愈升愈有，上星期向來被視為避險的黃金，由慢熊變成快熊，昨日執筆時金價見過1,404美元一安士，足足比上周高位1,590美元，撻咗近190美元，有人話股市係一個大賭場，今日沽神變燈神，揩邊瓣死邊瓣，都咪話唔信邪。

昨日中國公布第一季GDP得7.7%，比街外估8至8.1%低一截，滬綜指隊穿2,200點，殊途同歸的港股，同日失守22,000點心理關口，上周累積升幅一鋪清袋，埋單計指數跌316點報21,772點。

放大圖片

放大圖片

銀紙最老實，主板成交比上星期五反彈近一成，去到550億元，從來跌市成交升唔係好兆頭，連續五日回落到一成樓下的沽空佔大市成交比例，也回升至11.5%，反映大戶見大市炒唔上，已經做晒兩手準備，掉頭向下炒。

回試兩萬機會存在

事實上，第一季尾、第二季初內地數據顯示，經濟復甦力度有減速迹象，基本條件唔配合之下，二月初至今彈散格局（彈完又散過）恐怕仲未玩完，如果萬六、萬八點係過去兩年港股低位，今年當股市氣氛轉差，試一試中期支持兩萬點關口的機會存在。

基金同散戶投資取態上，最大分別係股民可以打個電話清倉去放假，基金經理就唔得，試問客仔又點會畀1至2%基本管理費養住佢地揸現金。個市唔掂，芬佬點都要搵地方泊錢，房地產信託基金係最好不過之選，畀芬佬收釘捱時間。今年領匯（00823）及置富產業（00778）累積升13.7%及14.8%，比見紅的恒指走勢好得多。

近大半年，隨着領匯個價屢創新高，預期股息率愈來愈低，唔少分析員都開始改口，但形勢比人強，至多睇中性，好少人敢建議沽售。

事實上，美日量寬不絕，十年美債息由早前2厘樓上，碌番落1.7厘，若非已揸夠貨，或者看官未必有興趣現價買嚟收息，怕一旦股市氣氛好轉，賺息輸價，但作為基金避險寒暑表，其實就算唔買，都應該昅到實。自特區政府出雙倍印花稅，同時進一步收緊按揭申請要求，留意近期唔少放盤業主，都開始肯主動減價賣樓，「價細」指標屋苑天水圍嘉湖山莊，新聞話減價6至8%先可以促成交易，減幅比買家額外付出的印花稅多（假設他們都不是首次置業），意味樓市已經堅跌。

無殼蝸牛心態矛盾

古勝認為，香港樓市需求彈性好大，遠嘅唔講，至少身邊幾個呻無樓的朋友，講到底唔少都認最怕樓市升，係因為人人賺錢自己執輸，驚愈來愈難上車，但掉轉頭問佢，如果未來十年樓價都停留現水平，租轉買興趣會大打折扣。

政府連環出招，近期樓價必升的共識的確正無聲無色地逆轉，最好嘅指標，係全城熱哄哄去抽新股一樣的青衣綠悠雅苑，唔少中簽者首日揀樓褪軚，如果問依家入唔入市好？

若有自用需要，其實幾時都可以買，擁有一個自用物業唔代表你long緊樓市，最多係market neutral，揸住第二間先算long緊樓市，如果連自住嗰間都未有着落，其實等於short緊，只能求神拜佛希望樓價跌幅會多過你每年幫個業主嘅供款。

釐清藥股投資目的

呢期大市偏弱，炒家視線離不開新能源同醫藥股兩個板塊，好似昨日又輪到醫藥股接力，泰凌醫藥（01011）升10%、四環醫藥（00460）升8%，古勝早前提及的石藥集團（01093）亦升穿了4元關，可謂強勢畢現。

如今內地流感新病毒疫情未明，炒醫藥股發災難財，只能抱短炒心態，因為當流感季節一過，炒作條件淡化，炒風唔會長，相關股份股價長線能否跑出，到底還是要取決於基本因素，投資者宜搞清楚投資目標，再揀合適的投資對象。

古勝