孖妹S檔案：四代股民強弱點分析

投資班學生廿歲至86

人稱「Tim Sir」嘅駿溢期貨董事郭樹鈿，炒股年資逾廿年，開班授徒之前，佢都係散戶一名，最輝煌戰績是趁住九七年紅籌股熱潮，利用35萬元本金去炒股票及窩輪，短期間內帳面獲利一度升至1,300萬元，不過之後市況逆轉，在沽唔切貨嘅情況下，戶口跌剩800萬元，叫做「執番身彩」。○四年一月，Tim Sir決定「下股海，教眾生」，至今調校出來嘅學生逾萬名，最老嘅86歲，最年輕都係20歲出頭，名副其實知道散戶心態。

郭：駿溢期貨董事兼投資班導師郭樹鈿（Tim Sir）

高妹： 你教過嘅學生多不勝數，點睇佢哋嘅投資態度先？

　郭： 任何年齡，男女老少，大部分學生第一日上堂都會問三個問題：（一）買邊隻股票？（二）現在買得未？（三）幾時沽貨？其實我好明白學生嘅心態，不過我唔係股神，點知邊隻股票包你贏錢，恒指幾時升又幾時跌？教書近十年，我發現不少散戶以為有個股票戶口，識得買貨沽貨，就當自己識炒股票，呢個係通病。現時我教三個投資班，股票、期權及期指，但我唔建議廿歲出頭嘅年輕人去學炒期指，因為風險好大，於是有個後生仔就話我歧視佢，由此證明年輕人嘅「炒心」真係非常旺盛，直至佢哋輸過痛過，先知識個「死」字點寫。

彩兒： 炒得股票嘅人，都係望發達o架喇！

　郭： 「60」後嘅散戶通常都會長揸幾隻實力股，後來見港股愈來愈升，覺得短炒都幾好玩，投資策略自然由長變短；「70後」散戶經歷過不少港股大跌浪，真身感受過輸錢嘅痛，令佢哋明白短炒要睇埋技術分析，所以先會走嚟上投資班；「80後」散戶最鍾意短炒科技股，可能同佢哋嘅生活模式接近喇，但呢群年輕人好鍾意追高，見隻股票愈升就愈買；不過我就唔太多「90後」學生，但感覺佢哋對不同類型投資工具都有興趣，樣樣都想學咁！

高妹： 我係「80後」散戶，真心嗰句，真係想短炒博贏快錢，可惜……

　郭： 經我長年累月嘅觀察，老年散戶始終主力炒股，中年散戶就會炒股加牛熊證，好似你咁年輕嘅散戶，基本上股票、窩輪、牛熊證都會玩。我就建議年輕人學吓玩期權，皆因可以刀仔鋸大樹，而且可以訓練睇市況升跌。但提到嚴守止蝕呢，就可以話任何年齡嘅散戶都做唔到喇！呢個真係難搞難教。

輸老婆本靠自己翻身

散戶曾錦安：「八三年，我入銀行打工做交易員，每月薪金1,650元，畀500元阿媽做家用，自己儲起1000元，儲到八五年就入市炒股喇，點知八七年股災殺到，輸咗成大半老婆本，於是惟有暫時離場養傷囉！後來終於搞掂晒人生大事喇，即係結婚呀、買樓呀，終於九四年重出缸湖。諗番轉頭！當年我哋要買咩都係靠自己，無錢咪去打工搵錢囉，邊有今時今日啲後生仔女咁幸福呀，買咩都問阿爸阿媽拎錢。但講番投資呀，無論過去與未來，個個散戶一定會聽消息去炒股係真嘅，八十年代初港股邊有依家咁多板塊，當年我哋通常炒地產、銀行同工業股。」

海嘯贏變輸轉攻期權

散戶Ryan：「○五年我開始炒股票，一直買一直贏，炒到○七年初，當時真係人人變股神o架！點知金融海嘯一個浪，我由贏緊四倍錢變成倒蝕，於是決定去報讀投資班，希望能夠真正了解股票買賣、技術指標等知識。」

「後來我學咗期權課程，發現呢種投資工具有不少好處，可利用不同策略去有效固定獲利及止蝕範圍，有助我減少投資壓力。現時每月投資回報約一萬元，我唔心急賺快錢，反而會去刨股票，慢慢致富。」

陣痛中學識分散風險

散戶Shelly：「想當年20歲出頭，我拎住自己辛辛苦苦儲起嘅十萬元本金就去炒股，投資初期個個散戶都係靠聽消息去買賣，呢個係必經階段嚟嘅！之後試過聽錯風，輸過錢，人自然會學識去做功課，唔再盲目相信貼士。至於投資策略，我梗係短炒喇，當年後生自然想博o架喇，想靠投資致富，做有錢人嘛！不過，九七年金融風暴都真係拖累我哋呢一輩嘅散戶，嗰時好多人輸錢呀，點知三年後又科網股爆破，累到不少散戶再傷多一鋪，呢兩件事都算股壇經典。當然喇，現時我梗係唔會淨係做短炒，會識得將資金做風險分配，長中短嘅策略都有。」

初戰逃過大難一額汗

散戶Edwin：「我由上年開始買股票，買嘅都係藍籌股，因為貪佢風險較低，而且我買股票前一定會做功課，嘗試分析間公司嘅生意模式、管理層質素、近期嘅關連交易同埋股權轉讓等等。初初我買過中移（00941），嗰陣買咗兩手，74蚊入貨，等到升咗一成，差唔多82蚊先放，成績算唔錯。另外仲買過滙控（00005）同國壽（02628）等，多數都賺到錢。舊年年中港股受歐債危機影響，搞到大市好鬼波動，好彩當時留意到唔少大戶減持股票，又聽到好多金融界嘅人講『cash is king』，所以一早已經放晒啲股票，無咩點蝕，諗落都一額汗！」

高妹、彩兒

若有料報畀高妹同彩兒或有嘢問，可電郵money.biz@opg.com.hk