Market Insight：汽車產銷保持強勁

睇番數據，美日股市年初至今已經分別累積380億及109億美元淨流入，佔基金流入已發展股市總量的六成三，截至上周，日股連續十二周淨流入，美國經濟復甦趨勢日益明顯，黑田拍心口今年即使政府開支提升至GDP總量2%，也務必要谷起通脹及經濟增長。

有故事配合，加埋股市深度足夠，新興市場難免被環球基金冷落，中國股市連續五周淨流出，與巴西同俄羅斯等市場變晒基金提款機。睇嚟一頭半個月內趨勢唔易逆轉，中港股市繼續消耗一二年下半年升勢，陰乾情況可能持續。睇番港股過去兩年的低點分別約在萬六及萬八點左右，最壞打算，今次浪底可能在兩萬點附近，個個股民都聽過高沽低揸，但問心講，現實世界又有幾人夠做得到？兩萬二點樓下，如能分批收集，其實已經係一個十分好的切入點，開始慢慢收集心頭好。

放大圖片

放大圖片

夜市港期唔易玩

美國國務卿克里訪華會見習近平前夕，免雙方在匯率尷尬，阿爺做啲嘢，人民幣匯價創匯改後新高，兌美元見6.19，兌港元確認穿8算水平。以往人仔升值，國企股唔多唔少都醒神啲啲，尤其欠落周身外債，最能受惠於人仔強勢令債務貶值的航空股，不過，今次情況唔同，內地H7N9疫情擴散未見底，仲係日日見新個案，對航空事業負面影響有幾勁，估計第二季業績先見真章，早前的低位可唔可以守得住，關鍵係疫情會否發展到人傳人，但講真，年初至今航空股調整幅度有限，值博率真係唔高。

期指夜市開咗啱啱一星期，古勝就無參與過，主要原因係十一點收市感覺難玩。好似上周五，美國早市因為零售及消費信心數據差過預期，隊過七十幾點。咁啱喺十點幾時段，夜市港期見勢色唔對，隊到阿媽都唔認得，居然要跌190點收市，比ADR推算出來的跌幅更大，如果追沽，之後見道指收市拗腰上番去，逃生無門仲肯定嘔血，如果真係手痕要賭夜市，勸大家開番個美期戶口好過，至少去或留彈性大好多。

華晨可望多兩眼

上周中汽協公布三月內地汽車產銷數字相當唔錯，分別208.5萬輛及203.5萬輛，增長超過一成創歷史新高，比市場預期好，亦都支持汽車股由近日低位反彈。

幾隻汽車股中，不妨留意吓華晨汽車（01114），早前股價由10元樓上，四日內隊落8.5元，有段傳聞話，業績發布後管理層同基金經理會面，在新一年固定投資數字上有點誤會，加埋市況麻麻，引發一輪拋售。睇番業績，華晨盈利23億元人仔，升27%同預期相若，市場焦點係與德國寶馬的合資項目貢獻增加32%，至24.34億元人仔，稍高過市場估計。公布業績後急跌另一個原因，係市場憂慮中央肅貪下，寶馬等豪華車銷售會受影響，但按管理層目標，今年寶馬產銷量20萬輛，按年增加兩成，以今年無新車型推出下，這程度的增長其實相當唔錯。

不過，市況唔就，芬佬要雞蛋裏挑骨頭都無計。走勢方面，華晨去年十一月起步位係8.6元，業績後見8.5元之後反彈，短期低位應該見咗，以今明兩年維持兩至三成盈利增長，目前市盈率12.5倍唔貴，無乜其他心水不妨留意。

游資揀中紡織股

呢期唔單只新能源股表現強勁，紡織股亦靜靜地起革命。天虹紡織（02678）股價由上月初5.4元水平升至上周五52周新高8.95元，累升幅度逾六成；聯泰控股（00311）股價亦由上月下旬1.7元水平升至上周高位見2.95元，累升幅度逾七成，其他如互太紡織（01382）走勢都對辦。就連二月以來股價一直下跌的福田實業（00420），上周股價亦止跌回升，上周五收報0.94元，升9.3%。不過初步睇，板塊起動係有游資揀估值低殘股炒一轉，多於受惠行業基本因素有明顯改善，跟炒轉身要夠快。

古勝