有食開漢堡包嘅朋友，一定聽過Burger King。原來Burger King喺香港及澳門業務係由創業板公司北亞策略（08080）喺二○○七年獲得港澳經營權。不過，呢種業務要有盈利都幾辛苦。二○一一年蝕咗1.4億元，上年頭三季先錄得少少盈利，但都只係得500萬元。證明Burger King賺咗先，你梗係守尾門。
愈講愈唔對路，決定靜靜地起革命（應該係特登），董事會表明要精簡非核心業務，計劃向一名叫沈棟的投資者，發行可換股優先股以及一批認股權證，最多集資近4億元，即係話4億一隻殼仔。沈棟主要於內地參與開發城市及航空城項目。集資所得，北亞策略會用來作收購航空城的物流及基建設施，以部署轉型，即係「棄包從建」大翻新咁話。
優先股行使價為0.228元，而認股證的行使價則為0.28元，較北亞策略停牌前的收市價，有溢價介乎5至29%。如果全面行使優先股及認股權，沈棟的公司持股量，將會由0%飆升至55%，理論上要提出全面收購（G.O.）。不過，新買家梗係點都要申請清洗豁免。
當無豁免，新買家亦都可以行使部分優先股同認購期權去到「神奇數字」29.9%，唔需要G.O.，同時這「神奇數字」又發揮神奇功效，令新買家可攻可守。公司若計劃轉型作物流基建，而又行使這「神奇數字」，小股民似乎冇乜着數！不過公司轉型最緊要係睇前景啫。繼續追蹤，出發！
香港大學電子金融服務榮譽助理教授 徐燦傑