香港總商會旗下雜誌《工商月刊》，呢期封面人物係長實（00001）副主席李澤鉅（Victor），雖然長江集團大幅拓展海外業務，Victor講明佢喺香港土生土長，香港係佢嘅家鄉，當有機會時，一定繼續喺香港進行投資。
不過對集團業務而言，要繼續擴展就要放眼香港外嘅市場。譬如集團喺全球經營超過一萬家零售店，同埋52個貨櫃碼頭，呢啲設施無可能全部設於香港。長江主力賣樓，Victor預告今年會馬不停蹄，淨係香港，今年可供推售嘅住宅單位多達5,200個。
Victor日理萬機，究竟點樣打理龐大嘅事業王國之餘，同時又係好兒子、好丈夫、好爸爸呢？Victor自言好幸運，因為佢熱愛自己嘅工作和家庭。假如一個人做佢喜歡嘅事，就可以平衡到工作同生活。
佢話：「正如很多父親一樣，我整天喺辦公室工作，晚上下班回家。我有四名子女，我們一家與我父親同住。這個傳統中國大家庭的模式，讓我們可以彼此分享黃金時間。有時我會把工作帶回家，有時我會把家人帶到工作中。而在周末，我會盡量預留時間共敍天倫。」佢又披露，會盡量抽時間在晚上游泳，呢項飯後運動對佢很有幫助。佢又話父親李嘉誠最近送咗啲佛學書籍畀佢，依家開始研讀。
余詩韻