上個月匹克（01968）先話，公司離復甦不遠，尋日安踏（02020）又講，公司存貨依家減得「七七八八」，不過內地體育用品行業嘅高庫存問題係咪真係「甩難」有望？偏偏有網購老友發現李寧（02331）幾日前跟凡客誠品聯手，喺網上搞咗次「賣剩蔗」割喉式減價閃購活動，仲要低至19蚊人仔就有交易。
李寧本身都有個官方商城，一直合作嘅知名電商平台都唔少，所以再請外援電商巨頭凡客誠品都唔出奇，驚嚇之處係在於佢開價之低，今次「李寧 For Vancl 48小時限時量購」活動，由上周日晚上十一時開始，其中原價199蚊人仔嘅運動恤只賣19蚊人仔，計落不足標價嘅一折，短短十八小時就畀網民盡掃全部售罄。
雖然活動提早結束成功促銷，但李寧嘅減價形象就無所遁形，家陣再上凡客個網睇，39蚊至49蚊嘅李寧特賣品都仲有貨賣。不過，有眼利網民話，有啲特賣品印嘅係李寧舊商標，即係話商品起碼係兩至三年前嘅舊貨。而內地報道亦引述李寧回應指，同凡客合作銷售嘅商品，都係同公司自營網絡平台及公司實體店貨品有區隔，所以對品牌唔會造成任何影響。
余詩韻