新加坡同香港一樣，樓價都係居高不下，都係同樣要政府多次出招去遏樓價。
不過近期永泰地產（00369）嘅母公司、即係新加坡永泰集團嘅主席兼董事總經理鄭維強或有關人士正放售大宅，市場估計成交價介乎2.5億至3億美元（約19.5億至23.4億元），比當地目前最貴住宅成交價1.08億美元（約8.46億元）貴一大截。
香港人對鄭維強或者會有啲陌生，查實佢一門幾傑，鄭維健係大佬，係前聯交所主席，二弟鄭維志就係永泰地產主席，三弟鄭維強被譽為新加坡公職王，係李資政密友，四弟鄭維新擔任好多香港公職，五弟鄭維榮就做過新加坡旅遊局主席及藝術局主席。
呢間新放售嘅大宅，位於大使館人員最愛嘅Nassim Road，附近有植物公園，以及香港人熟悉嘅購物區烏節路。地皮面積8.5萬方呎，有一間兩層高嘅獨立屋、游泳池同埋網球場。負責銷售嘅新加坡仲量聯行就話，呢類富豪大宅好少放售，通常十幾年先至一間，加上呢塊地皮可分成三個地段重建發展，預計除個別富豪外，會吸引發展商入標競投，推高售價。
絲絲記得，香港有紀錄最貴大宅成交價，應該係一○年維他奶後人羅氏家族出售嘅壽山村道39A大屋，作價11.48億元，物業其後被拆細重建。若果新加坡呢間屋最終以19.5億元或以上售出，真係一次過打破埋香港紀錄，屆時新加坡樓市想唔變得熱鬧都幾難。