Market Insight：瑞聲舜宇互相輝映

呢兩日壞消息突然煙消雲散，但恒指仍未升穿下降軌，始終不得安心。滬綜指昨日亦轉跌為升，外貿數據再次成地眼鏡碎，可以解讀為出口轉弱、內需轉強，但前日CPI大跌又可解釋為消費疲弱，總之祖國數據經常係玩死人。出口增長由二月之21.8%大降至三月之10%，進口亦由-15.2%飆升至14.1%，如斯大幅波動可算是「中國特色」。

美銀美林認為，頭兩個月出口咁勁之原因是出口商虛報而從外匯流入中獲利，另外可賺出口退稅，海關總署亦表示關注，三月出口大跌可能係海關加強檢查，令數據回復「正常」，平情而論，出口升一成已經相當不錯。

放大圖片

放大圖片

外貿數據一向較受重視，因為有其他國家數據參照，灌水成分較低，但近幾個月數據既反覆又誇張得幾難令人信服。有人睇三月發電量幾乎冇增長，貨運更倒退2.2%，此等數據反映中國經濟好極有限。

借殼上市除笨有精

班大孖沙喺派完成績表之後再度增持，對大市氣氛有一定幫助，而超人同四叔一向都係積極分子，結果長實（00001）、和記黃埔（00013）同恒基地產（00012）等均有追捧。張茵亦有增持玖龍紙業（02689），不過今勻業績過後大股東增持案例唔算多，可能覺得現時自己隻股票仲未算抵買。除咗和黃升逾4%之外，保險股低位回升，近期表現低沉嘅大笨象（00005）突然發力，內房股抽高等，均成為升市火車頭。

又一隻殼股狂升！恒力商業地產（00169）復牌升足4倍幾，公司賣盤畀房地產商大連萬達，一直冇人吼之股份，街貨亦唔慌多，所以升起上嚟如入無人之境。

燃氣板塊順風順水

依家殼價嗌到4、5億銀，主要係上市條例收緊，第四季開始保薦人要負上刑事責任，而內地有超過600間公司排緊隊上市，因此買殼「走後門」除笨有精。近年上市嘅細細粒新股有好多具有賣殼條件，但能否一箸夾中要講命水。

太陽能股見到陽光，歐洲千家光伏企業要求歐盟唔好制裁中國，因為損人終會害己。歐洲唔同美國有頁岩氣幫手，天然氣要靠俄羅斯揸頸就命，德國又話放棄用核電，制裁中國上游企業等於用石頭砸自己腳。

太陽能股近期大上大落都幾難玩，但燃氣股就一直係順風順水，近期更炒加價潮，多個城市都有民眾排隊或囤積天然氣，若大家要呼吸新鮮空氣，就自然要捱貴「氣」。

雖然大市成交未見起色，但新能源股繼續輪流炒作，而智能手機設備股亦唔輸蝕，昨日見瑞聲科技（02018）股價再創52周新高39.15元，收報38.75元，升4.8%，成交1.8億元，今年以來股價累升幅度已逾四成，可謂大幅跑贏大市！

主要原因係，公司除咗一直向蘋果公司供應手機零件外，去年更成功取得三星嘅訂單，今年蘋果公司同三星都有新手機產品推出市場，兩個產品誰勝誰負有待分曉，但邊個勝出瑞聲都係大贏家，股價迭創新高不無道理。

揀啱實力股唔怕坐

此外，舜宇光學（02382）股價亦不斷尋頂，由今年初5元邊升到上近期高位見9.7元。瑞信剛發報告，將舜宇一三至一五年度預測每股盈利調高3.1至9.9%不等，主要預計其手機相機模組銷售增長佳，且本季起開始向三星大量供應手機鏡頭，故將其目標價上調一成至11元，相等於一三年預測市盈率15倍，亦即係話現價較之仍有15%上升空間。

所以話，喺魚缸搵食亦要因時制宜，好似呢啲市指數反覆偏軟交投淡靜，靠日日炒出炒入難搵食兼要食驚風散，反而睇準個別行業形勢揀隻實力股坐定定，贏面更高！

古勝