尋日立法會議員張華峰難得抽空同絲絲一班行家飯局，席間佢突然「爆肚」話不如夜晚開埋港股！吓？絲絲有冇聽錯，係人都知，中小經紀對港股加時「反枱」咁滯，堅決恢復食飯時間。
張華峰就話佢都係講笑啫，只不過佢覺得港交所（00388）即將開「夜期」，但就冇現貨市場套戥，橫掂證券行夜晚開門都要「燈油火蠟」，倒不如開埋港股啦！但呢啲絕對唔代表業界嘅意見。
今日佢會同港交所股本證券與定息產品及貨幣聯席主管陳秉強等見面，除咗傾吓普拉達（01913）金融交易稅點收之外，亦都會講「夜期」。佢始終覺得可以小試先行，以3%為上下限價，但佢都深知大局已定，惟有希望六個月後檢討時能作調整。
據絲絲了解，雖然中小經紀好想港交所幫佢哋將金融交易稅轉交意大利，但依家意大利政府究竟點收都未講清楚，所以喺佢釐清點收之前，港交所好難有實際嘢做到喎，暫時港交所可以做都係繼續同港府溝通，同透過上市公司出通告向股東交代。
另外，小加總裁昨日又寫網誌，今次佢將內地市場比喻為「蒸餾水」，雖然好清，但俗語都有謂「水清無魚」，所以市場冇創新動力。相反，西方市場監管寬鬆，就好似一池「渾水」，養肥咗好多「池底魚」，但水愈來愈濁，終於爆發金融危機。香港剛好喺東西拉鋸之間，所以可以發揮機遇。