絲絲講場：星展高博德人工贏晒歐資大行
除咗經濟環境，舊年歐洲同亞洲嘅銀行高層薪酬都真係兩個世界喇，事關星展集團行政總裁高博德（Piyush Gupta）去年度嘅薪酬按年大升一成半，至大概750萬美元（約5,850萬港元），已經拋離咗兩間歐資大行：巴克萊銀行同德銀嘅高層薪酬。
德銀巴克萊低一截
舊年西方銀行又被調查又被罰款，都唔怪得佢哋高層嘅薪水會比亞洲銀行少，就好似德銀嘅兩位行政總裁，舊年每人袋走620萬美元人工；而巴克萊嘅行政總裁薪酬仲少，只有約400萬美元，後者更聲言拒絕接受花紅，梗係啦，巴克萊舊年係二十年來第一次虧損，受不當銷售金融產品要賠償拖累，損失金額仲高達10.4億英鎊！
亞洲呢邊嘅情況就好好多，星展集團嘅盈利更創新高至38.1億新加坡元，所以高博德嘅天價薪酬先可以袋袋平安。話時話，星展香港對母公司嘅盈利貢獻都唔少o架喎，咁高博德咪真係要多謝香港人？