絲絲講場：郭建波賭輸誓要京城裸跑
深圳英聯不動產董事長郭建波同華遠地產董事長任志強，輸賭今年三月內地嘅房價會跌，如果唔係就喺北京長安街裸跑。郭建波就喺三月三十日晚在微博上認輸，仲好認真咁向北京市公安局官方微博發出「裸奔申請」﹗
呢個賭注舊年年底落嘅，喺三月頭已經有人急不及待，質問郭建波，既然樓價冇跌，點解仲唔去裸跑？郭建波當時就話要睇埋三月底官方嘅房價數據。點知三月未完，佢就認輸。
微博申請 公安當玩
考慮到「怕圍觀者眾，引發治安壓力」，郭建波喺微博向北京市公安局官方微博「@平安北京」提出申請：「我去年底，在微博上公開與預測了今年三月份房價會暴漲的北京地產商任志強，立貼對賭不可能暴漲，反而是下跌拐點，賭嘅籌碼是我輸了，就要裸奔北京長安街十公里。三月份快過去了，我提前認輸並據有關規定向貴局申請批准本人近日履約。」
唔知係咪接近愚人節，「@平安北京」就當郭建波嘅「申請」係講笑，唔打算喺微博上公開回應，仲建議郭建波應該依法依規行事！
樓價不跌 提早認輸
官方數據仲未公布就提前認輸，郭建波話因為「認為自己可能輸了」。其實喺四月一日，中國指數研究院就發表數據，顯示今年三月全國100個樣本城市中，超過八成城市房價上漲，其中郭輸賭嘅北京、廣州、深圳更平均錄得超過2%升幅。雖然唔少人包括絲絲在內，都認為郭建波今次向官方部門「申請裸奔」係為自己搵下台階，不過佢就表明無論獲唔獲得官方批准，佢都會履約。
余詩韻