期指觀瀾：市底仍弱候機食胡
日股連跌兩日，影響假期後復市港股表現，恒指昨先低後高作結，升68點收報22,367點，不過留意到三個因素，顯示升市市底其實仲相當之「虛」。恒指昨升幅近五成九來自一隻滙控（00005），實際反映市況的股份升跌比例，出現34對66的一面倒情況，意味三分之二股份要跌，大戶托住重磅股散貨味極濃。
其次大市成交升市不升反縮，主板僅601億元，是過去十四個交易日以來最少。三是成交唔升之餘，沽空佔總成交比例，由假前11.3%上升至12.42%，上次咁高沽空比已經是八月三十日，可見大戶買貨興趣及唔上沽空咁大。
期指昨即市高低位分別在22,472及22,097點，早在十點前出現，之後維持窄幅上落直到收市，全日密集成交區域在22,300至22,400點之間的百點內，加權平均成交價在22,335點，筆者懷疑幾日後夜市開波，進一步拉長交易時間，不過折磨即市炒家多幾個鐘頭，呆坐電腦前。
以昨日高位22,472點計，仲差百點先到目標22,581點，22,185點的好倉揸近兩星期，今日會搵機會食胡，由技術走勢，短期跌浪的0.5反彈阻力遲遲未能收復，後市即使唔跌，反彈動力唔慌勁。
John Mullen