Market Insight：避險至上 揀高息股

近期最擔心係，有朝一日歐美股市掉頭，弱勢的港股隨時會跟住一齊跌。昨日外圍氣氛真係油麻地，歐元區三月製造業PMI再跌穿50盛衰分界，落到去46.8，返回去年十二月以來最低。

日本股市連隊兩日，皆因今明兩日本央行議息，即使提早推出黑田提出的量寬措施，市場老早已經炒定先，惟一旦按程序辦事，等到一四年至推出，今年累積升近兩成的日股，唔畀人質到爆就奇。試問咁嘅環境，點會令人有興趣去買貨。

歐債危機無限復活，一陣塞浦路斯搞妥又話斯洛文尼亞財困，最終聯儲局退市預期的炒作，不了了之，反映長期利率走勢的美國十年債孳息，由2.1厘碌番落去1.8厘附近，加埋市況唔就，有迹象顯示資金繼續眷戀高息股，兩隻REITs領匯（00823）及置富產業信託（00778）近月一直貼住歷史高位橫行向上。

放大圖片

放大圖片

大股東入市有啟示

年初至今，電能（00006）亦累升11.3%，跑贏大市一條街。本來中電（00002）預期息率3.8厘，算係半隻高息股，早前份業績驚喜唔大，但就揚言為配合政府的環保及減排要求，輸入天然氣令成本壓力大增，未來幾年需大幅調高電費。

社會輿論對加價無好感，故最後加幅會唔會又係「叫高開低」，只能等歷史告訴我們。但值得留意是，去年十二月開始米高嘉道理家族持續從市場增持，是近三年多來首次。巴菲特話大股東身體力行入市最信得過，一一年至今因為澳洲業務阻滯，中電幾乎無升過，今次大股東入市，畀到小股東一個重要啟示。

業績期剛過，傳統上大市會比較靜侷，古勝嘅基金老友話早兩星期出席的績後管理層面談會，有唔少小貓三幾隻，芬佬少過高管的尷尬情況，有些甚至連One-on-one都唔多人吼，訂唔滿。

瑞銀撐三大地產股

當然，這不排除二月中市況氣氛逆轉，影響賓架尋寶的興趣外，今年特別多上市公司，堆埋三月最後兩星期先出業績，芬佬自然分身乏術，邊去得晒這類面談會，從好的角度，或者今年有較多的二三線漏網之魚，等看官們去發掘發掘。

港股昨復市成交縮番到六字頭，恒指升68點收報22,367點，大戶力托滙控（00005）頂住個指數，不過二三線卻係跌多升少，中銀監嚴管理財產品影響力仍在發酵，中信銀行（00998）及民生銀行（01988）分別跌6%及4.2%，「國五條」地方細則曝光，同分析員預期出入唔大，加埋三月百大城市樓價升幅加快，部分內房股趁壞消息出盡反彈，世茂房地產（00813）升4.8%，保利置業（00119）升2%，碧桂園（02007）及遠洋地產（03377）升1.5%。

本地方面，特首三度推出辣招後，瑞銀地產分析員調低全年樓價預測，由原來估計持平到5%跌幅，擴大到5至10%，認為地產股由一月中高位平均調整近17%之後，目前平均資產淨值折讓擴大到38%，已充分反映樓價潛在下跌風險，首選長實（00001）及新世界發展（00017），主因是短期推盤主攻用家，辣招下影響相對輕。

另該行亦睇好新地（00016），強調公司是繼領匯外在港擁最多商場零售物業的巨無霸，近年逐步把商場轉型，吸引內地遊客策略可取。

藥股投機注意風險

內地再現禽流感疫情，但見A股市場生物醫藥股走勢低迷；港股方面，醫藥股亦僅個別發展，即市股價創52周新高的有康哲（00867）、盈天醫藥（00570）、廣藥（00874）、石藥（01093）、四環（00460）及東瑞（02348），其中以東瑞升幅最大，收報2.34元，升12.5%，成交1,136萬元。若單論升幅，泰凌（01011）表現亦見突出，收報0.85元，升13%，成交600萬元。

天氣乍暖還寒，正值流感高峰期，每年呢個時候都有唔少病人因流感併發症死亡，係咪有新病毒流入社區，目前仍言之尚早。

呢個時候炒醫藥股，可以話係季節性嘅動作，但實際上相關企業能否真正受惠，始終要睇番個別嘅基本因素，跟風投機買賣宜注意風險，冇得輸打贏要！

古勝