長假前夕，中國銀監突然出招話要規範理財產品，唔單止A股插到三個月新低，本來已無乜鑊氣的香港二三線，更加水盡鵝飛，強如華晨（01114）、瑞年（02010）等基金愛股，都趁機會畀大孖沙懲戒，跌幅超過一成，認真誇張。
三月業績期過去，業績一般而倒升的股票，往往有尋寶價值，尤其近半年，唔炒股份累積升幅唔細，高位危危乎驚基金派貨，不如來個逆向思維，睇番價殘無人吼的煤炭股，上星期首鋼資源（00639）出成績表，全年盈利跌兩成，比上半年一成跌幅大，但大致在市場預期內，中央雖然話發展潔淨能源，減少霧霾為禍，但首鋼資源正係主攻低污染精煤，無論業務前景同估值上，應好過其他同業，上星期出業績後倒升，顯然壞消息出盡大孖沙炒番轉頭，幾倍PE，近兩個月股價又響3.2至3.6元間浮沉多時，如再企番去3.5元樓上，偷步買入博破位，短期睇3.8元，穿10日線3.36元止蝕。
達哥
