李寧（02331）在去年年底一早醒咗份盈警畀大家嘆，等大家有晒心理準備。一出成績表，股東即刻無眼睇，盈轉虧加勁蝕19.8億元人仔，都咪話唔恐怖！
睇吓盤數，集團營業額跌咗24%，毛利率跌到37.8%。Prof. J話齋，魔鬼在細節，致命傷係在於兩大撥備：存貨撥備5.88億元人仔、應收帳撥備9.37億元人仔。見到咁樣，完全體會到體育用品股嘅境況係幾咁艱苦！
存貨問題，Prof. J覺得可能係管理層嘅業務預算出現重大偏差所致，管理層無得抵賴。應收帳確係另一個致命傷，9億元人仔肯定唔係一日就爆出嚟。大家都知，中國人做生意：「情、理、法」。拖數唔在講，真係一句「好兄弟，謝謝你！」就搞掂！將以前舊債未清，新債免問嘅理念一一打破！李寧無計之下，繼續供貨，貨畀咗，錢又收唔番，最後梗係好傷啦！加上手頭現金又「窄窄哋」，如果唔抽水同舉債，公司嘅乾塘指數將會創新高。
如果大家唔善忘，今年一月，李寧已經發行公司換股證券變相以二供一供股，集咗18億元。近日李寧宣布進軍童裝業，Prof. J只係擔心又係曇花一現。但如果唔求變，營運模式依舊，又不斷燒銀紙，咁樣會變成一個惡性循環。最後係點，以Prof. J當今嘅思維水平都諗唔掂。管理層已承認「困難重重，挑戰處處」咁話，希望李寧可以重振當日為○八年北京奧運會傳火棒嘅雄風咁就好！繼續追蹤，出發！
香港大學電子金融服務榮譽助理教授 徐燦傑