期指觀瀾：市況拉鋸先平好倉
長假期前，內地銀監出手打擊銀行理財產品，收緊農村金融機構平台貸款消息一出，內地股市散水味濃，滬綜指上周四急跌2.8%。香港假期期間A股變動唔大，昨日滬綜指收報2,334點，比上周四收市價2,336點仲要低2點，反彈極為乏力。
期指夜市淡靜居多
上周四，A股弱勢，拖累恒指午後見過22,132點低位後，拗腰收22,299點，跌165點，並同日收復10日線22,258點，應咗大淡好尾市。但美中不足是午後好友反攻，四月期指反彈止於22,350及22,344點，未可進一步逼近22,412點的開市價，並見陽燭及倒轉錘頭的短期見底訊號。
港股說明政策市實在難玩，一心準備好等期指彈到近22,581點食胡，又被打亂部署，仲有幾日期指開始夜市交易，炒家初期觀望難免，筆者一直認為夜市准許波幅過大，若成交唔夠好易畀大戶上下其手，多多孖展都唔夠補。
今明兩日，現貨如果仲繼續在23,262至21,975點短期調整浪的0.5反彈阻力約22,618點樓下拉鋸，筆者會選擇唔等目標出現，先行平倉，短期同佢鋪鋪清，暫時決定唔會揸倉過夜市。
John Mullen