經過收購友邦保險（01299）呢單交易「撻Q」後，英國保誠（02378）有幾個主要投資者嬲到想行政總裁譚天忠落台。不過，人總係善變嘅，近日呢班投資者就猛咁幫譚天忠講好話，話唔使落台，減吓花紅算數喎！至於係咪真係要減花紅，下星期開估！
尋日講到保誠畀英國金融服務局（FSA）罰3,000萬英鎊，而譚天忠又唔需要為呢件事請辭，仲一蚊都唔使罰，據聞幾位主要投資者都收晒火。
絲絲聽講，本來佢哋一心要趕譚天忠落台，近日竟然一改口風，幫譚天忠護航，話佢表現幾好，開到聲話唔想見到佢走，如果真係要懲戒佢，減花紅都ok喎！
搞到要減花紅，點解當時保誠冒住咁大風險，都唔將佢哋想收購友邦嘅事，預先話畀FSA知呢？絲絲聽講，嗰陣保誠個諮詢人瑞信多次提醒保誠要將收購行動轉告有關當局，點知保誠唔聽話，原來係驚講咗畀FSA聽之後，收購呢單嘢會通天呀！
點都好啦，學FSA話齋，件事都過咗去，相信譚天忠嘅花紅數目將為呢件事畫上句號。
余詩韻