舊年關於內銀嘅負面消息都唔少，但睇番四大國有銀行舊年嘅成績表，又一啲都唔差喎，盈利連續第六年創新高，合共大升15%，至到7,162億元人民幣。
有心水清嘅人計數，結論係比美國四大行嘅盈利，足足多出超過一倍！
四大內銀嘅股本回報率（ROE）一樣跑贏西方同儕，平均ROE達21%，比美國四大行嘅7.3%高出接近三倍，後者嘅盈利就只係上升咗9.6%至519億美元。歐洲銀行更加不濟，當地嘅三大行平均ROE只有5.96%，盈利夾埋仲急跌兩成半，至232億美元。
中央限制外資「扶一把」
內銀實力雄厚，同中央限制外資銀行進入中國好大關係，令內銀少啲競爭對手，佢哋梗係如魚得水啦！反觀西方銀行過去一年嚟麻煩不斷，又被罰款又被調查，盈利能力當然大打折扣喇。
但係市場對西方銀行嘅前景比較睇好，彭博社調查反映，分析師預計今年大型內銀同美國銀行嘅盈利，分別會上升4%同31%，邊個會跑贏就要到年底先知喇。
余詩韻