財匯局尋日出咗年報，即將卸任嘅行政總裁甘博文一二年度薪酬連花紅等共有361萬元，較之前年度只輕微增加1%，跑輸通脹喎！
同港交所（00388）一眾高層一二年度底薪連花紅、獎授股份等，動輒收成千萬元相比，真係「冇得比」。
係人都知，港交所前上市科主管狄勤思即將過檔財匯局，接替甘博文做CEO，以狄勤思舊年喺港交所袋成千二萬，佢「跳槽」唔知使唔使減薪呢？
不過，港交所同財匯局雖然都係屬監管機構，兩者無論喺性質同規模都好唔同，港交所更加係上市公司，所以根本冇得直接比較。狄勤思一向對監管工作好有熱情，佢以前又做過財匯局成員，對財匯局好熟悉，又有感情，可能「講心唔講金」！
其實「講心唔講金」以往都有例子，好似現任證監會行政總裁歐達禮，前年重返證監會，做開律師大行嘅佢，聽聞要減薪返去證監會。
講番財匯局，去年佢哋完成九宗個案調查，又展開三宗查訊，又抽查75份上市公司財務報表，效率唔錯喎！
余詩韻